இலங்கையில் முன்னாள் நாடாளுமன்ற உறுப்பினர்களுக்கு வழங்கப்பட்டு வரும் ஓய்வூதியத்தை ரத்து செய்வதற்கான அரசாங்கத்தின் தீர்மானம் அரசியல் வட்டாரங்களில் பெரும் கவனத்தை ஈர்த்துள்ளது.
.jpeg)
முன்னாள் நாடாளுமன்ற உறுப்பினர்கள் மற்றும் அவர்களது வாழ்க்கைத் துணைக்கு வழங்கப்பட்டு வரும் ஓய்வூதிய உரிமையை முழுமையாக நீக்குவதற்காக புதிய சட்டமூலம் ஒன்றை கொண்டு வர அரசாங்கம் நடவடிக்கை எடுத்துள்ளது. இதற்கான கொள்கை ரீதியான அனுமதி அமைச்சரவை மட்டத்தில் ஏற்கனவே வழங்கப்பட்டுள்ளதாக தெரிவிக்கப்படுகிறது.
1971 ஆம் ஆண்டு முதல் அமலில் இருந்து வரும் நாடாளுமன்ற உறுப்பினர்களுக்கான ஓய்வூதியச் சட்டத்தை ரத்து செய்யும் வகையில் இந்த சட்டமூலம் நாடாளுமன்றத்தில் சமர்ப்பிக்கப்பட உள்ளது. புதிய சட்டம் அமலுக்கு வந்தால், தற்போது ஓய்வூதியம் பெற்று வரும் முன்னாள் நாடாளுமன்ற உறுப்பினர்கள் மற்றும் அவர்களது குடும்பத்தினருக்கும் வழங்கப்படும் ஓய்வூதியம் நிறுத்தப்படும் என கூறப்படுகிறது.
எனினும், இதுவரை வழங்கப்பட்ட ஓய்வூதியத் தொகைகளை மீளப் பெற அரசாங்கம் நடவடிக்கை எடுக்காது என்றும் அதிகாரிகள் தெரிவித்துள்ளனர்.
அரசாங்கத்தின் இந்த முடிவு அரசியல் மற்றும் பொருளாதார ரீதியாக பரவலான விவாதங்களை ஏற்படுத்தியுள்ளது. பொதுச் செலவினங்களை குறைக்கும் முயற்சியாக சிலர் இதை வரவேற்கின்ற நிலையில், முன்னாள் அரசியல்வாதிகளின் உரிமைகள் பாதிக்கப்படலாம் என சில தரப்புகள் கவலை வெளியிட்டுள்ளன.
இந்த விடயம் தொடர்பான சட்டமூலம் நாடாளுமன்றத்தில் விவாதிக்கப்பட்ட பின்னரே இறுதி தீர்மானம் எடுக்கப்படும் என எதிர்பார்க்கப்படுகிறது.
Post a Comment