இலங்கையில் நிலவும் தீவிர டெங்கு பரவல் காரணமாக, கல்வி மற்றும் உயர்கல்வி நிறுவனங்களைப் பாதுகாப்பதற்கு விசேட நடவடிக்கைகள் முன்னெடுக்கப்பட்டு வருகின்றன.
பல்கலைக்கழகங்களுக்குள் டெங்கு நோயாளர்கள் கொத்தணிகளாக அடையாளம் காணப்பட்டால், சுகாதாரப் பிரிவினரின் அறிவுறுத்தல்களுக்கு அமைய பல்கலைக்கழகங்களை தற்காலிகமாக மூட நடவடிக்கை எடுக்கப்படும் என கல்வி மற்றும் உயர்கல்வி பிரதி அமைச்சர் மதுர செனவிரத்ன தெரிவித்துள்ளார்.
கண்காணிப்பில் பல்கலைக்கழகங்கள்:
இது குறித்து கருத்துத் தெரிவித்த பிரதி அமைச்சர், தேசிய ரீதியில் டெங்கு தொற்று அபாயகரமான நிலையில் உள்ளதாலும், அதிக அவதானம் செலுத்த வேண்டிய மாவட்டங்கள் பிரகடனப்படுத்தப்பட்டுள்ளதாலும் இந்தத் தீர்மானம் எடுக்கப்பட்டுள்ளதாகக் குறிப்பிட்டார். கட்புல அரங்கேற்றக் கலைகள் பல்கலைக்கழகம் ஏற்கனவே மூடப்பட்டுள்ளமைக்கு, அங்கு டெங்கு நோயாளர்கள் கொத்தணிகளாகக் காணப்பட்டமையே காரணம் என்றும் அவர் தெரிவித்தார்.
பல்கலைக்கழக மானியங்கள் ஆணைக்குழுவினால் நாட்டின் அனைத்துப் பல்கலைக்கழகங்களுக்கும் டெங்கு தடுப்பு மற்றும் சுகாதார வழிகாட்டல்கள் ஏற்கனவே வழங்கப்பட்டுள்ளன.
மீண்டும் திறப்பு:
கட்புல அரங்கேற்றக் கலைகள் பல்கலைக்கழக அதிகாரிகளுடன் நடத்தப்பட்ட கலந்துரையாடலுக்கு அமைய, அந்தப் பல்கலைக்கழகத்தை எதிர்வரும் 13 ஆம் திகதி மீண்டும் திறப்பதற்கு எதிர்பார்க்கப்படுவதாகவும் பிரதி அமைச்சர் மேலும் தெரிவித்தார். மாணவர்களின் பாதுகாப்பை உறுதிப்படுத்தும் அதேவேளை, கல்வி நடவடிக்கைகள் தடையின்றித் தொடர்வதை உறுதி செய்யவும் உரிய நடவடிக்கைகள் எடுக்கப்பட்டு வருகின்றன.
