அமெரிக்காவின் பொஸ்டன் நகரிலுள்ள பிரபல விடுதி ஒன்றில் அந்நாட்டுப் பொலிஸாரால் நடத்தப்பட்ட அதிரடிச் சோதனையின் போது, இலங்கையைச் சேர்ந்த பௌத்த தேரர் ஒருவர் பாலியல் குற்றச்சாட்டில் கைது செய்யப்பட்டுள்ளார்.
விடுதியில் பாலியல் சேவைகளைப் பெற முயன்றதாகக் குற்றம் சாட்டப்பட்டு பொலிஸாரால் கைது செய்யப்பட்ட 7 சந்தேக நபர்களில், இலங்கையைச் சேர்ந்த பௌத்த தேரர் ஒருவரும் அடங்குவதாகப் பொஸ்டன் பொலிஸார் அதிகாரப்பூர்வமாகத் தெரிவித்துள்ளனர்.
'ஆபரேஷன் ரெட் கார்ட்' விசேட பொலிஸ் நடவடிக்கை:
அமெரிக்காவில் வசித்து வரும் 32 வயதான மஹாயாயே வினீத என்ற தேரரே இவ்வாறு பொலிஸாரால் கைது செய்யப்பட்டுள்ளார். கடந்த சனிக்கிழமை ரிவியர் விடுதியில் இந்த விசேட சோதனை நடத்தப்பட்டுள்ளது.
உலகக் கோப்பை கால்பந்து தொடரை முன்னிட்டு, மனிதக் கடத்தல் மற்றும் தவறான தொழில் ஒழிப்புக்காகப் பொஸ்டன் பொலிஸாரால் 'ஆபரேஷன் ரெட் கார்ட்' என்ற பெயரில் விசேட ஒழிப்பு நடவடிக்கை ஒன்று முன்னெடுக்கப்பட்டுள்ளது. இதன் ஒரு பகுதியாகவே இந்த அதிரடிச் சோதனை நடத்தப்பட்டுள்ளது. வணிக ரீதியிலான பாலியல் தொழிலுக்காகப் பெண்கள் மற்றும் சிறுவர்கள் பயன்படுத்தும் விளம்பர வலையமைப்பைக் கண்டறிந்து ஒழிப்பதே இந்த நடவடிக்கையின் முக்கிய நோக்கமாக இருந்ததாகப் பொலிஸார் குறிப்பிட்டுள்ளனர்.
டஃப்ட்ஸ் பல்கலைக்கழக ஆலோசகர் பதவி பறிபோனது:
மஹாயாயே வினீத தேரர் உட்பட கைது செய்யப்பட்ட 7 சந்தேக நபர்களுக்கும் எதிராக, பணத்திற்குப் பாலியல் சேவைகளைப் பெற்ற கடுமையான குற்றச்சாட்டின் கீழ் பொஸ்டன் மத்திய மாநகர நீதிமன்றத்தில் வழக்கு தொடரப்பட்டுள்ளது.
கைது செய்யப்பட்ட இந்தத் தேரர் அமெரிக்காவின் புகழ்பெற்ற டஃப்ட்ஸ் பல்கலைக்கழகத்தில் பௌத்த மத ஆலோசகராகப் பணியாற்றி வந்தவராவார். இந்த அதிர்ச்சிச் சம்பவத்தைத் தொடர்ந்து, அவர் தனது பல்கலைக்கழகப் பதவியிலிருந்தும் உடனடியாக விலகியுள்ளதாகத் தெரிவிக்கப்படுகிறது.
மஹாயாயே வினீத துறவி, கடந்த 2024 ஆம் ஆண்டு டிசம்பர் மாதமே டஃப்ட்ஸ் பல்கலைக்கழகத்தின் பௌத்த மத ஆலோசகராக அதிகாரப்பூர்வமாக நியமிக்கப்பட்டார். அங்கு அவர் பௌத்த தியானச் சங்கத்திற்கு வழிகாட்டுதல், தியான நிகழ்ச்சிகள் மற்றும் ஆன்மீகப் போதனைகளை நடத்தும் முக்கியப் பணிகளை மேற்கொண்டு வந்துள்ளார்.
ஹார்வர்ட் பல்கலைக்கழகத்தில் முதுகலைப் பட்டம்:
இலங்கையில் பிறந்த இவர், தனது 10 ஆவது வயதிலேயே துறவறம் பூண்டுள்ளார். அத்துடன், கடந்த 2022 ஆம் ஆண்டு மே மாதத்தில் உலகப் புகழ்பெற்ற ஹார்வர்ட் டிவினிட்டி பாடசாலையில் பௌத்த மதப் படிப்பில் முதுகலைப் பட்டமும் பெற்றுள்ளார் என்பது குறிப்பிடத்தக்கது.
எனினும், இந்தச் சம்பவம் தொடர்பாகக் கைது செய்யப்பட்ட சந்தேக நபர்கள் எவரும் இதுவரை நீதிமன்றத்தால் அதிகாரப்பூர்வமாகக் குற்றவாளிகளாக நிரூபிக்கப்படவில்லை என்பதுடன், இதற்கான விரிவான வழக்கு விசாரணை எதிர்வரும் நாள்களில் நீதிமன்றத்தில் நடைபெறவுள்ளமை குறிப்பிடத்தக்கது.