இலங்கையில் உருவாகியுள்ள எரிபொருள் மற்றும் எரிசக்தி மேலாண்மை சவால்களை முன்னிட்டு, அரசாங்க நிறுவனங்களில் வீட்டிலிருந்து வேலை செய்யும் முறையை செயல்படுத்தும் சாத்தியங்களை ஆய்வு செய்ய அமைச்சரவை குழு தீர்மானித்துள்ளது.
இந்த கூட்டம், பிரதமர் ஹரினி அமரசூரிய தலைமையில் இணைய வழியில் நடைபெற்றதாக தெரிவிக்கப்பட்டுள்ளது.
ஏப்ரல் 16 மற்றும் 17 ஆகிய திகதிகளில் அரசாங்க அலுவலகங்களில் இணையவழி பணியாற்றும் திறனை பரிசோதிக்கும் முயற்சிகள் மேற்கொள்ளப்பட உள்ளன.
மத்திய கிழக்கில் நிலவும் போர் சூழ்நிலையால் ஏற்பட்டுள்ள எரிபொருள் பற்றாக்குறையை கருத்தில் கொண்டு, அரச சேவையை இடையூறு இல்லாமல் தொடர்வதே இதன் நோக்கமாகும் என தெரிவிக்கப்படுகின்றது.
இந்த சந்திப்பின் போது, அத்தியாவசிய சேவைகளை பாதிக்காமல், எரிபொருள் மற்றும் மின்சார பயன்பாட்டை கட்டுப்படுத்தும் நடவடிக்கைகளின் முன்னேற்றமும் ஆய்வு செய்யப்பட்டது.
அத்துடன், அத்தியாவசிய சேவைகள் ஆணையாளர் நாயக அலுவலகம் வெளியிட்ட வழிகாட்டுதல்கள் அமைச்சக மட்டத்தில் எவ்வாறு நடைமுறைப்படுத்தப்படுகின்றன என்பதும் கவனத்திற்கு கொண்டு வரப்பட்டது.
ஊடக மற்றும் சுகாதார அமைச்சு ஆகியவை மார்ச் 31ஆம் திகதியளவில் டீசல் பயன்பாட்டில் 42% சேமிப்பை எட்டியுள்ளதாகவும், மின்சாரம் மற்றும் நீர் மேலாண்மை திட்டங்கள் வெற்றிகரமாக செயல்படுத்தப்பட்டு வருவதாகவும் தெரிவிக்கப்பட்டுள்ளது.
மேலும், ஏப்ரல் 7 மற்றும் 9 ஆகிய திகதிகளில் பாடசாலைகளில் எரிசக்தி சேமிப்பு தொடர்பான விழிப்புணர்வு நிகழ்ச்சிகள் நடத்த திட்டமிடப்பட்டுள்ளது.
பல்கலைக்கழகங்களும் தேவைக்கேற்ப இணையவழி கற்றல் முறையை பயன்படுத்தி வருகின்றன.
இதேவேளை, கிராம சேவகர் சேவை நுழைவுத் தேர்வு உள்ளிட்ட முக்கியத் தேர்வுகள் திட்டமிட்டபடி நடைபெற்றதாக பொதுநிர்வாக அமைச்சு அறிவித்துள்ளது.
போக்குவரத்து, டிஜிட்டல் பொருளாதாரம், நீதித்துறை உள்ளிட்ட பல அமைச்சகங்கள் குறைந்த அளவு அவசிய பணியாளர்களுடன் நேரடி சேவையையும், மற்ற பணிகளை இணையவழி முறையிலும் தொடர்ந்து வழங்கி வருவதாகவும் குறிப்பிடப்பட்டுள்ளது.